checun par son ranc et ordre, et mesmement les douze sierges de la Ville et de Nostre-Dame.
Après venoit le corptz porté par six coriers de l'esglize Nostre-Dame dudit Puy, monstrant le visage, estant revestu comme s'il estoit en son pontifficat, avec la mitre à la teste, où fust, après les messes, miz dans une caisse boix pin, et après dans la tumbe susdite, et fust enterré ce vandredy à midy, 3oe aoust 1641, avec grande muzicque, prières funèbres, grandz regretz et gémissemantz à tout le peuple et non sans cause, de la grande perte que l'on a faict d'avoir perdu un sy bon prellat et maintien de toute la ville. Ledit jour de son enterrement l'on fist féste, où les portes des maisons demeurarent fermées tout ledit jour, et les cloches de toute ladite ville sonoient pendant huict jours soir et matin.
Et comme ledit corptz estoit à trante pas de ladite esglize des Jésuistes, les pères et frères Jésuistes y sont allés audevant jusques à la porte de ladite esglize, en procession avec une grande croix, pour le recepvoir avec prières. Le landemain l'on fist un grand retour à ladite esglize, où [furent] messieurs les chanoines et coriers de ladite grand esglize, acompaigniant les asistans et amis, en prossession avec les trois croix et bedeau, chantant les litanies des saintz, où l'on ouffroit le jour dudit enterrement et retour un sol checun; et après lesdites offrandes, ly avoit un père Jésuiste qui feset une exortation de louvanges dudit deffunt et de sa maison où se brulla quantité de cyre. Ladite esglize des pères Jésuistes estoit toute tapissée de noir avec des pourtraictz dudit deffunt et d'épigrames ou efiges que les escoiliers avoient faict à ses louvanges.
Et pandant qu'il demeura mort dans l'évesché, l'on le lessoit aller voir à qui volloit dans sa chambre, sur un grand lict faict exprès, et ladite chambre richement parée de duehl, toute ardante de grande quantité de sierges et chandelles.
Et ce vandredy 290 aoust 1642, l'on a faict son bout de l'an avec grandes sérimonies et asistances des esglizes, sonnement de cloches et autres, comme fust faict à sondit enterrement.